आगामी प्रधानमन्त्री शेरबहादुर देउवा नै होः आरजु राणा

धनगढी । परराष्ट्रमन्त्री आरजु राणा देउवाले आगामी प्रधानमन्त्री आफू नभई शेरबहादुर देउवा नै बन्ने बताएकी छन् । धनगढीमा आयोजित पत्रकार भेटघाटमा बोल्दै राणाले यस्तो बताएकी हुन् ।

केही दिनअघि प्रधानमन्त्री केपी शर्मा ओलीले महिला प्रधानमन्त्री बनाउन चाहेको सार्वजनिक अभिव्यक्ति दिएका थिए । प्रधानमन्त्रीको सो अभिव्यक्तिपछि धेरैले आरजुलाई लक्षित गरेर सो अभिव्यक्ति दिएको आशंका गरिरहेको बेला आरजुले आगामी प्रधानमन्त्री देउवा भएको बताएका हुन् ।

पत्रकारहरुको प्रश्नको जवाफ दिँदै आरजुले भनिन्, ‘प्रधानमन्त्री बन्न पहिले संसदीय दलको नेता बन्नुपर्छ । बाहिरबाट हेर्दा एउटा देखिएला तर, पार्टीभित्रै मेरो हैसियत कति छ मलाई थाहा छ । राम्रो कल्पना हो ।’

प्रधानमन्त्री ओलीले महिला प्रधानमन्त्री बन्ने भनेर बोलेकोमा उनले धन्यवाद समेत दिइन् । यद्यपि प्रधानमन्त्री ओलीको भनाइ आफूप्रति लक्षित नभएको जस्तो लागेको राणाले बताइन् ।