चाइनिज पिपुल्स हस्पिटलमा काठमाडौँ महानगरले ताला लगायो

काठमाडौँ। काठमाडौँ महानगरपालिकाले बौद्धस्थित चाइनिज पिपुल्स हस्पिटलको प्रशासन शाखामा ताला लगाएको छ। महानगरले अनुगमनको क्रममा कानुनी प्रक्रिया पूरा नगरी सञ्चालन गरेको पाइएकाले ताला लगाइएको हो।

दर्ता नगरेकाले उक्त अस्पतालमा ताला लगाएको नगर प्रहरीले जनाएको छ। सन् २००८ देखि सञ्चालनमा आएको उक्त अस्पताल हालसम्म दर्ता नभएको बताइएको छ। पटकपटक निर्देशन दिँदा पनि नियममा आउन नमानेपछि उक्त अस्पतालमा ताला लगाएको नगर प्रहरी प्रमुख राजुनाथ पाण्डेले बताए।

प्रशासनमा ताला लगाएसँगै अस्पतालमा उपचाररत बिरामी अन्यत्र सार्न महानगरले निर्देशन दिएको छ।

स्वास्थ्य संस्था सञ्चालन ऐनविपरीत सञ्चालनमा रहेका तथा मापदण्ड पूरा नगरेका अस्पतालहरूलाई कारबाहीको मागसहित महानगरले जेठ १७ गते स्वास्थ्य मन्त्रालयलाई ६८ वटा अस्पतालको सूची पेस गरेको थियो।