भोजपुर । भोजपुरका किसानलाई अहिले धान रोपाइँको चटारो परेको छ ।
मनसुनी वर्षा शुरु भएसँगै खेतमा पानी भरिएपछि कृषकहरू बिहानैदेखि खेतमा व्यस्त हुने गरेका छन् । सिँचाइ अभावमा आकाशे पानीको भरमा रोपाइँ गर्दै आएका किसान यस वर्ष समयमा नै वर्षा शुरु भएपछि खुसी भएका छन् ।
समयमा पानी परेपछि राहत महशुस भएको किसानको भनाइ छ । विगतका वर्षमा असारको पहिलो सातापछि मात्रै रोपाइ शुुरु हुने भए पनि यस वर्ष जेठ अन्तिममा पर्याप्त पानी परेपछि भोजपुरको सबै क्षेत्रमा रोपाइँ शुरु स्थानीय किसानको भनाइ छ ।
जिल्लाको बोखिम टक्सार, सिद्देश्वर, गुप्तेश्वर, कोट,लगायत जिल्लाका नौ ओटै स्थानीय तहको तल्लो भेगमा धान खेती हुने गर्दछ । कृषि ज्ञान केन्द्र भोजपुरका अनुसार कुल खेतीयोग्य जमिनको क्षेत्रफल ६२ हजार दुई सय ९९ हेक्टर मध्ये १२ हजार ५० हेक्टर क्षेत्रफलमा धान हुने गर्दछ ।
