काठमाडौँ। पशुपतिनाथको शिवलिङ्गमा राखिएको सुनको जलहरीमा नयाँ तथ्यहरु भेटिएको छ। अख्तियार दुरुपयोग अनुसन्धान आयोगले जलहरीको नापतौल र गुणस्तर क्यारेट परीक्षण गर्दा केही नयाँ तथ्यहरु भेटिएको हो।
आइतबार दिउँसो दुई बजेदेखि मन्दिर परिसर पूर्णरूपमा खालि गराई जलहरी निकालेर नापजाँच गर्ने काम सोमबार बिहानमात्र सकिएको छ। जलहरीमा १०७.७६ किलोग्राम सुन प्रयोग हुनुपर्नेमा १०७.४६८७ किलोग्राम पाइएको अख्तियार स्रोतको भनाई छ।
त्यस्तै जलहरीमा तत्कालीन राष्ट्रपति विद्यादेवी भण्डारी, तत्काली प्रधानमन्त्री केपी शर्मा ओली, तत्कालीन संस्कृतिमन्त्री भानुभक्त ढकाल, तत्कालीन पशुपति क्षेत्र विकास कोषका सदस्य–सचिव प्रदीप ढकाल, कोषका कोषाध्यक्ष, पशुपतिका मूल भट्ट, अन्य दुई मूल पूजारीसहित १३ जनाको नाम कुँदिएको पाइएको छ।
अख्तियार दुरुपयोग अनुसन्धान आयोगले नेपाली सेना, सशस्त्र प्रहरी, नेपाल प्रहरी, जनप्रतिनिधि र पशुपति क्षेत्र विकास कोषको रोहवरमा पशुपतिनाथ मन्दिरभित्र राखिएको जलहरी नापतौल र परीक्षण गरेको हो।
नापतौलका क्रममा सुनको परिमाण र गुणस्तरबारे कमजोरी पाइएको हो। त्यसको सम्पूर्ण तथ्यहरू अनुसन्धान पूरा भएपछि सार्वजनिक गरिने बताइएको छ।
