काठमाडौँ। भौतिक पूर्वाधार तथा यातायातमन्त्री प्रकाश ज्वालाले डोजरे विकास प्रवृत्तिको अन्त्य गर्न सरकार प्रतिवद्ध रहेको बताएका छन्। बिहीबार राष्ट्रियसभा बैठकमा बोल्दै मन्त्री ज्वालाले यस्तो बताएका हुन्।
अध्ययनबिना डोजर चालकको भरमा सडक निर्माण हुँदा अनेकौं प्राकृतिक विपत्तिहरू भइरहेका भन्दै असारे र डोजरे विकास प्रवृत्ति अन्त्य गर्न सरकार प्रतिवद्ध रहेको उनको भनाई छ।
उनले डोजरे विकासका कारण सयौँ बिगाहा खेतीयोग्य भूमि पुरिने र पुल तथा पूर्वाधारमा क्षति हुने गरेको बताए।
‘बिना अध्ययन डोजर चालकको भरमा सडक निर्माण हुँदा अनेकौँ प्राकृतिक विपत्ति हुँदै गइरहेको कुरा सत्य हो। डोजरे विकासले सयौँ बिगाहा खेतीयोग्य भूमि पुरिने र बहुमूल्य पुल तथा पूर्वाधारमा क्षति हुने गरेको छ। हामी असारे र डोजरे विकास प्रवृत्ति अन्त्य गर्न प्रतिवद्ध छौँ,’ मन्त्री ज्वालाले भने, ‘राजधानी काठमाडौँ र विभिन्न राजमार्गका खाल्डाखुल्डी मर्मत सम्भार गरेर यात्रुहरूलाई पीडा हुन नदिन मन्त्रालय अन्तर्गतका निकायहरूलाई निर्देशन दिइसकिएको छ।’
उनले नारायणघाट–मुग्लिन सडक खण्डमा पहिरोका अल्पकालीन, मध्यकालीन र दीर्घकालीन समाधानमा उपाय खोजी गरी कार्यान्वयन गरिने प्रतिवद्धता व्यक्त गरे।
