काठमाडौँ । प्रधानमन्त्री पुष्पकमल दाहाल ‘प्रचण्ड’ ले आज मन्त्रिपरिषद् विस्तार गर्दैछन् । नयाँ मन्त्रीहरूलाई शीतल निवासमा साँझ ५ बजे शपथ ग्रहणको तयारी गरिएको हो ।
एमालेबाट पार्टी सचिव समेत रहेका रघुवीर महासेठ उपप्रधान तथा भौतिक पूर्वाधार मन्त्रीसहित एमालेको तर्फबाट सरकारको नेतृत्व गर्ने छन् ।
एमालेबाट एक राज्यमन्त्रीसहित ८ मन्त्री बन्ने बताइएको छ । जसमध्ये पदम गिरी मन्त्री भइसकेका छन् भने बाँकी ८ जनामध्ये महासेठको नाम टुंगिएको हो । माओवादीबाट थप दुई मन्त्रीले शपथ लिने छन् । नारायणकाजी श्रेष्ठ उपप्रधानसहित परराष्ट्र र वर्षमान पुन अर्थमन्त्री बन्ने भएका छन् । यसअघि हितबहादुर तामाङले मन्त्रीको शपथ लिइसकेका छन् ।
रास्वपाले पनि थप तीनजना मन्त्री टुंग्याएको छ । रास्वपा अध्यक्ष रवि लामिछाने उपप्रधानमन्त्री तथा गृहमन्त्री बन्ने भएका छन् । शिक्षामन्त्रीमा रास्वपाले सुमना श्रेष्ठलाई पठाउने भएको छ । संसदीय दलका उपनेता विराजभक्त श्रेष्ठ युवा तथा खेलकुदमन्त्री बन्ने भएका छन् ।
उपसभापति डीपी अर्याललाई श्रममा पठाइने भएको छ । उनले यसअघि शपथ लिइसकेका छन् ।
