कोशी प्रदेशका तीन मन्त्रीले शपथ लिए

काठमाडौँ। कोशी प्रदेशका नवनियुक्त मन्त्रीहरूले शपथ लिएका छन्। प्रदेश प्रमुख पर्शुराम खापुङ्ले उनीहरुलाई शपथ गराएका हुन्।

नेकपा माओवादी केन्द्रबाट नियुक्त जीवन आचार्य र राजेन्द्र कार्की तथा नेपाली काङ्ग्रेसबाट नियुक्त भएका रामकुमार खत्रीले पद तथा गोपनीयताको शपथ पनि लिएका छन्।

उनीहरू तीनै जनालाई मुख्यमन्त्री उद्धव थापाले आज मन्त्री नियुक्त गरेका हुन्। आचार्य पहिले पनि एमाले नेतृत्वको सरकारमा मन्त्री थिए। उनी प्रधानमन्त्री पुष्पकमल दाहाल प्रचण्डका छोरी ज्वाइँ हुन्। उनकी पत्नी गंगा दाहाल प्रचण्डको स्वकीय सचिव छन्। आचार्यलाई आर्थिक मामिला तथा योजना मन्त्रीको जिम्मेवारी दिइएको छ। अरु भने विनाविभागीय छन्।

बिहीबार मुख्यमन्त्री नियुक्त भएका थापाले शुक्रबार शपथ ग्रहण गरेका थिए। त्यो दिन नेपाली कांग्रेस र एकीकृत समाजवादीका एक–एक जनालाई मन्त्री नियुक्त भए पनि माओवादी केन्द्र सहभागी भएको थिएन।