काठमाडौँ। नेपाली कांग्रेसका नेता चन्द्र भण्डारीले कांग्रेस केन्द्रीय समितिको बैठक राष्ट्रिय मुद्दा छाडेर शक्ति प्रदर्शनको गर्ने थलो बनेको भन्दै असन्तुष्टि व्यक्त गरेका छन्।
बीपी स्मृति सप्ताह अन्तर्गत भएको कार्यक्रममा भण्डारीले सबै नेताहरु दुई युवा महामन्त्रीमाथि खनिएकोमा आलोचना गरे। ‘मैले सोचेको थिएँ, कांग्रेसको केन्द्रीय समितिको बैठकले धेरै मुद्दाहरु उठाउनेछ तर, कांग्रेस केन्द्रीय समितिको मिटिङ कस्तो भयो? केन्द्रीय समितिको बैठकमा एकले अर्कालाई गाली गर्ने, खुइल्याउने? राष्ट्रिय एजेण्डाहरुलाई नछुने? उनले भने, यसको कारणले कांग्रेस बलियो भएको छ कि कमजोर भएको छ? अहिलेको हाम्रो चुनौती यही हो।’
उनले नेपालका कम्युनिष्टहरुसँग प्रतिस्पर्धा गर्नु राजासँग लड्नुभन्दा कठिन हो भन्ने कुरा कांग्रेसले बुझ्नुपर्ने बताए। अहिले कांग्रेसको व्यवहार र शैलीले आफूहरुले चाहेको कुनै प्रयास सफल नहुने उनको भनाइ छ।
महामन्त्रीले प्रस्तुत गरेको एजेण्डा राम्रो भएको उल्लेख गर्दै नेता भण्डारीले रुपान्तरण अभियानको सुझावलाई सम्बोधन गर्नुपर्नेमा जोड दिए।
