काठमाडौँ। राष्ट्रिय स्वतन्त्र पार्टी (रास्वपा)का सभापति रबि लामिछानेले संसद हाइज्याक भएको प्रतिक्रिया दिएका छन्। सभापति लामिछानेले संसद्मा सत्तारुढ नेपाली कांग्रेसका सांसद सुनील शर्मा र नेकपा एमालेका सांसद मानवीर राईलाई मात्र बोल्न दिएर सभामुख देवराज घिमिरेले शून्य समयको कारवाही प्रारम्भ भएको सुनाएपछि लामिछानेले विरोध जनाएका हुन्।
सभामुखले बोल्नको लागि समय नदिएपछि अक्रोशित देखिएका लामिछानेले टेबल ठोक्दै भने, ‘सभामुख महोदय संसद् हाइज्याक गर्न पाइन्छ? संसद् कुनै दल विशेषको मात्र हो?’
त्यस्तै सोमबारको संसद बैठक पनि अवरोध भएपछि उनले सामाजिक संजालमार्फत संसद अपहरणमा परेको प्रतिक्रिया दिएका हुन्।
क्विन्टल सुजन प्रकरणमा प्रमुख प्रतिपक्ष दल नेकपा एमालेले छानबिन आयोग गठनको माग गर्दै संसद अवरोध गर्दै आइरहेको बेला रास्वपा संसदीय दलका नेता समेत रहेका लामिछानेले उक्त प्रतिक्रिया दिएका हुन्।
सुन तस्करी प्रकरणबारे नेपाल प्रहरीको केन्द्रीय अनुसन्धान ब्यूरो (सीआईबी)ले अनुसन्धान गरिरहेको भए पनि एमालेले भने उच्चस्तरिय छानबिन आयोग गठन गर्नुपर्ने माग गर्दै सदन अवरोध गर्दै आएको छ।
