जनकपुरधाम। जनता समाजवादी पार्टी (जसपा) नेपालको भ्रातृ संगठन समाजवादी युवा संघको केन्द्रीय अध्यक्षमा सञ्जीव यादव चयन भएका छन्।
शनिबार जनकपुरधाममा बसेको युवा संघको पदाधिकारी बैठकले यादवलाई समाजवादी युवा संघको केन्द्रीय अध्यक्षमा निर्विरोध चयन गरेको हो। यसअघि उनलाई बैठकले अध्यक्षमा प्रस्ताव गरेको थियो।
आइतबार जसपा मधेश प्रदेशको पार्टी कार्यालयमा बसेको केन्द्रिय समितिको बैठकले सो प्रस्तावलाई अनुमोदन गरेर उनलाई निर्विरोध चयन गरेको हो।
यादव तत्कालीन मधेशी जनअधिकार फोरम नेपाल युवक संगठनका संस्थापक सदस्य हुन्। फोरम नेपालबाट राजनीतिमा होमिएका अध्यक्ष यादव मधेशी किसान फोरमको महासचिव थिए।
त्यसपछि युवा फोरमको केन्द्रीय सदस्य, कोषाध्यक्ष हुँदै जसपा गठनपछि समाजवादी युवा संघमा उनी वरिष्ठ उपाध्यक्षको जिम्मेवारी थिए। संघको पदाधिकारी बैठकबाट उनलाई कार्यवाहक अध्यक्षको जिम्मेवारी दिइएको थियो।
सिरहाको सिरहा नगरपालिका ३ मखनाहा निवासी यादव लामो समयदेखि राजनीतिमा सक्रिय रहदैँ आएका छन्।
