राष्ट्रपतिलाई गैरसंवैधानिक काम गर्न उक्साइयो – एमाले

काठमाडौँ । नेकपा एमालेले राष्ट्रपतिलाई गैरसंवैधानिक काम गर्न उक्साइएको आरोप लगाएको छ । प्रतिनिधिसभाको सोमबारको बैठकमा बोल्दै एमालेका सांसद योगेश भट्टराईले यस्तो आरोप लगाएका हुन् ।

सांसद भट्टराईले भने – “राष्ट्रपति संसद्भन्दामाथि हुँदैन । राष्ट्रपति भनेको संसद्को अंग हो। राष्ट्रपतिले संसद्बाट पठाएको प्रमाणित गरेको विधेयक प्रमाणीकरण गर्ने अधिकार छ ।”

‘प्रधानमन्त्री पुष्पकमल दाहाल प्रचण्डलाई विधेयक प्रमाणीकरण गर्न सिफारिस गर्ने अधिकार कसले दियो ?’ उनले प्रश्न गरे ।

मृत्यु भइसकेको विधेयक प्रधानमन्त्रीले ब्युँताउन नमिल्ने उनको भनाइ छ ।

‘मृत्यु भइसकेको विधेयकलाई ब्युँताउने तागत प्रधानमन्त्रीसँग छ भने प्रधानमन्त्रीसँग मेरो अनुरोध छ द्वन्द्वकालमा मारिका १७ हजार मान्छेलाई पनि ब्युँताइदिउँन त एकपटक । यदि ब्युँताउने अधिकार छ भने ।’ सांसद भट्टराईले भने ।