एमाले अध्यक्षद्वारा पूर्वराष्ट्रपति भण्डारीको बचाउ

काठमाडौँ। नेकपा एमालेका अध्यक्ष केपी शर्मा ओलीले पूर्वराष्ट्रपति विद्यादेवी भण्डारीको बचाउ गरेका छन्। सोमबार प्रतिनिधिसभाको बैठकमा बोल्दै अध्यक्ष ओलीले नागरिकता विधेयक प्रमाणीकरण नगरेको विषयमा तत्कालीन राष्ट्रपति भण्डारीको बचाउ गरेका हुन्।

उनले संसद्‌ले पारित गरेर पठाएको विधेयक फिर्ता पठाउने राष्ट्रपतिको हक भएको जिकिर गरे। त्यतिबेला सत्ता पक्षले संसद्‌मा बाहुबल देखाएर नागरिकता विधेयक पारित गरेको बताए। सत्तापक्षले तत्कालीन राष्ट्रपति भण्डारीको अपमान गरेको ‌ओलीको भनाइ थियो।

उनले भने, ‘विधेयक फिर्ता पठाउने राष्ट्रपतिको हक हो। तपाईंहरुले बाहुबल देखाएर राष्ट्रपतिको अपमान गर्नुभो। त्यो संवैधानिक थियो। राष्ट्रपति संसद्‌को बहुमतको दादागिरीको देखाउने ठाउँ होइन।’