आफू पार्टी नेतृत्वमा नबस्ने मनस्थितिमा पुगेको प्रचण्डको भनाई

काठमाडौँ । नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्डले आफू पार्टी नेतृत्वमा नबस्ने मनस्थितिमा पुगेको बताएका छन् ।

मंगलबारदेखि सुरू भएको माओवादी केन्द्रको २९औं विधान सम्मेलनको उद्घाटपछि शुभकामना दिँदै अध्यक्ष प्रचण्डले पार्टी नेतृत्वमा कोही तयार भए आफूले पद छोडिदिने बताएका हुन् ।

‘कोही कमरेड तर्क तथ्यसहित आउनुहुन्छ भने म पद छोड्न तयार छु । भन्नुहुन्छ भने मलाई नेतृत्वमा बसिराख्न लोभ छैन ।’

अध्यक्ष प्रचण्डले सबै क्रान्तिकारी एकताबद्ध हुने राम्रो अवसर भएको उल्लेख गरे ।

त्यस्तै, सामाजिक न्याय र सुशान कायम गरेर अगाडि बढ्ने अवसर भएको बताउँदै उनले संकल्प गर्ने यस दिनमा सबै एकताबद्ध हुन अपिल गरे । जनयुद्ध नेपालको इतिहासको दूरगामी महत्त्वको रहेको र आगामी दिनमा पनि रहने विश्वास व्यक्त गर्दै अध्यक्ष प्रचण्डले नेपालमा जनयुद्ध सम्भव छ भन्ने निष्कर्षसहित आफूहरु अगाडि बढेको र सोहीअनुसार जनताले अभियानमा सहयोग प्रदान गरेको स्मरण गरे ।