विराटनगर। नेकपा माओवादी केन्द्रले कोशी प्रदेश सरकार छाड्ने भएको छ। सरकार छाड्ने निर्णय गर्नका लागि आज संसदीय दलको बैठक र पार्टी प्रदेश कमिटीको बैठक बस्दैछ।
बैठकपछि सरकारमा सहभागी माओवादी केन्द्रका दुई मन्त्रीले राजीनामा दिनेछन्। माओवादीले सरकार छाडेपछि मुख्यमन्त्री हिक्मतकुमार कार्की अल्पमतमा पर्नेछन्।
दलका नेता इन्द्रबहादुर आङ्बोसहित पार्टीका प्रदेश पदाधिकारीको बैठक आज बस्दैछ। बैठकले निर्णय गरे लगत्तै राजीनामा दिने तयारीमा मन्त्रीहरू छन्।
सोमबार बसेको माओवादी संसदीय दलको बैठकले दलका नेता आङ्बोको नेतृत्वमै वैकल्पिक सरकार गठन गर्न भन्दै पहल गर्ने निर्णय गरेको थियो।
प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले भारत भ्रमणबाट आएलगत्तै तत्काल सरकार छाड्न निर्देशन दिएका थिए। उनको निर्देशनपछि सरकार छाड्ने निर्णयमा माओवादी केन्द्र पुगेको हो।
प्रदेशसभामा नेकपा एमालेका ४०, नेपाली कांग्रेसका २९, नेकपा माओवादी केन्द्रको १३, राप्रपाको ६, नेकपा एकीकृत समाजवादीको ४ र जसपाको १ सांसद छन्।
