काठमाडौँ । नेपाली कांग्रेसका नेता डा. शेखर कोइरालाले सत्ता गठबन्धन टुट्दा निर्वाचनको म्यान्डेटको पालना नभएको टिप्पणी गरेका छन् ।
सभापति शेरबहादुर देउवाको निवास बूढानीलकण्ठमा सोमबार बिहान बसेको पदाधिकारी र पूर्वपदाधिकारीको बैठकपछि कोइरालाले यस्तो बताएका हुन् । डा. कोइरालाले गठबन्धन टुट्दा त्यसले कांग्रेसलाई घाटा मात्र नहुने बताए ।
कोइरालाले भने, ‘गठबन्धन टुटुदा तत्कालका लागि घाटा देखिन्छ । हाम्रा केन्द्र सरकारका मन्त्री, प्रदेश सरकारमा मुख्यमन्त्री र मन्त्रीहरूका पद गएका छन् । उहाँहरूले सरकारबाट जनतामा डेलिभरी दिने अवसर टुटेको छ ।’
पछिल्लो राजनीतिक घटनाले कांग्रेसले सब चिज नगुमाएको कोइरालाले बताए । यसले कांग्रेसलाई अर्को अवसर दिएको बताए । कांग्रेस अब जनतामा जाने र पार्टी निर्माण गर्ने उनको भनाई छ ।
कोइरालाले कांग्रेसले आफूलाई जनताकेन्द्रित गरेपछि कसैसँग गठबन्धनको बाध्यता हटेर जाने तर्क गरे ।
