काठमाडौँ । लुम्बिनी प्रदेशका मुख्यमन्त्री डिल्लीबहादुर चौधरीले पदबाट राजीनामा दिएका छन् । बिहीबार दिउँसो बसेको प्रदेशसभा बैठकमा सम्बोधनपछि उनले राजीनामाको घोषणा गरेका हुन् ।
माओवादी केन्द्रले फागुन २३ गते समर्थन फिर्ता लिएपछि एक महिनाभित्र विश्वासको मत लिनुपर्ने प्रावधान अनुसार मुख्यमन्त्री चौधरीले विश्वासको मत लिनुपर्ने थियो । तर विश्वासको मत नपुग्ने भएपछि चौधरीले पदबाट राजीनामा दिएका हुन् । चौधरी गत वैशाख १४ गते लुम्बिनी प्रदेशको मुख्यमन्त्रीमा नियुक्त भएका थिए ।
लुम्बिनी प्रदेश सरकारमा अहिले नेपाली काँग्रेस, नागरिक उन्मुक्ति, जसपा, लोसपा र जनमत छन् । प्रदेशमा एमालेका २९ सांसद, काँग्रेसका २७ सांसद, सभामुखबाहेक माओवादी केन्द्रका १०, राप्रपा र नागरिक उन्मुक्तिका चार–चारजना सांसद रहेका छन् । तर राप्रपाका जानकीलाल यादव भ्रष्टाचारको मुद्दामा निलम्बित भएका छन् ।
यस्तै प्रदेशमा जनता समाजवादी, लोकतान्त्रिक समाजवादी र जनमत पार्टीका तीन–तीनजना सांसद छन् भने एकीकृत समाजवादी र राष्ट्रिय जनमोर्चाका एक एकजना सांसदसहित एकजना स्वतन्त्र सांसद छन् ।
केन्द्रमा बनेको सहमति अनुसार अब प्रदेशको नेतृत्व माओवादी केन्द्रको भागमा परेपछि माओवादी केन्द्र लुम्बिनी प्रदेशका संसदीय दलका नेता जोखबहादुर महरा मुख्यमन्त्री बन्ने लगभग पक्का छ ।
