काठमाडौँ । नेकपा एमालेले आज ७५ औं स्थापना दिवस मनाउँदै छ । यस अवसरमा गणतन्त्र गौरव सम्मान पूर्वराष्ट्रपति विद्यादेवी भण्डारीलाई प्रदान गरिने भएको छ ।
एमाले राष्ट्रिय महाधिवेशन प्रतिनिधि परिषद्को बैठकले पुर्व राष्ट्रपति विद्यादेवी भण्डारीलाई आज गणतन्त्र गौरव सम्मान अर्पण गर्ने निर्णय गरेको हो । यसैबीच एमालेको राष्ट्रिय महाधिवेशन प्रतिनिधि परिषद्को बैठक सम्पन्न भएको छ । पार्टी अध्यक्ष केपी शर्मा ओलीको अध्यक्षतामा दुई दिन आयोजना गरिएको बैठकमा अध्यक्ष केपी शर्मा ओलीद्वारा प्रस्तुत राजनीतिक प्रतिवेदन र महासचिव शंकर पोखरेलको सांगठनिक प्रतिवेदन सर्वसम्मत रूपमा पारित गरिएको छ ।
त्यसैगरी, केन्द्रीय निकायहरू सल्लाहकार परिषद्, अनुशासन आयोग, लेखा आयोग र निर्वाचन आयोगका प्रतिवेदनहरू पनि सर्वसम्मत रूपमा पारित भएका छन् । बैठकको पहिलो दिन प्रतिवेदनहरू प्रस्तुत गरिएका थिए भने दोस्रो दिन ६ वटा समूहमा प्रतिवेदनहरू र पार्टीको संगठन सुदृढीकरण सम्बन्धी विषयहरूमा छलफल गरी आवश्यक सुझाव संकललन गरिएको थियो ।
उक्त बैठकले १४ बुँदामा विभिन्न समसामयिक प्रस्तावहरू पारित गरेको छ । बैठकले सर्वसाधारणको रकम अपचलनका गम्भीर अपराधलाई निष्पक्ष छानबिन गरी दोषीलाई कानुनको कठघरामा ल्याउन माग गरेको छ ।
