काठमाडौँ । प्रभु शाह नेतृत्वको आम जनता पार्टी (आजपा) ले इलाम–२ मा हुने उपनिर्वाचनमा पहिचानवादीका उम्मेदवार डकेन्द्रसिंह लिम्बुलाई समर्थन गर्ने भएको छ ।
प्रवक्ता चन्द्र भूषण साहले मुढा चुनाव चिन्ह लिएर ठूला दललाई चुनौती बनेका लिम्बुलाई पार्टीको तर्फबाट समर्थन गर्ने निर्णय भएको जानकारी दिए ।
अहिलेको उपनिर्वाचन परिणामले संसदीय अङ्कगणितमा खासै फरक नपारे पनि राजनीतिक मुद्दाहरूको बहस र संघर्षमा विशेष प्रभाव राख्ने भएकाले आजपाले गम्भीरतापूर्वक लिन मतदातालाई आह्वान गरेको छ । लिम्बुलाई यसअघि नै उपेन्द्र यादव नेतृत्वको जसपा, बाबुराम भट्टराई नेतृत्वको नेसपा, धरान उपमहानगरका प्रमुख हर्क साम्पाङलगायतले समर्थन जनाएका छन् ।
इलाम दुईमा एमालेको तर्फबाट सुहाङ नेम्वाङ, कांग्रेसबाट डम्बर खड्का, रास्वपाबाट मिलन लिम्बू प्रतिस्पर्धामा छन् । इलाम क्षेत्र २ मा संविधानसभा अध्यक्ष तथा एमाले उपाध्यक्ष सुवास नेम्वाङको निधन भएपछि रिक्त स्थानमा यहि बैशाख १५ गते उपनिर्वाचन हुन लागेको हो ।
