काठमाडौँ नेकपा एमालेका अध्यक्ष केपी शर्मा ओलीले शिक्षा, विज्ञान तथा प्रविधि मन्त्रीसमेत रहेकी रास्वपा सांसद सुमना श्रेष्ठलाई लक्षित गरी दिएका अभिव्यक्तिमा प्रष्टीकरण दिएका छन् । सत्तारूढ नेकपा एमालेका अध्यक्ष ओलीले चितवनको भरतपुर विमानस्थलमा शुक्रबार पत्रकारहरूसँग कुराकानी गर्दै ओलीले सो कुरालाई अनावश्यक ढंगले जोडिएको बताए ।
‘त्यो कसैसँग सम्बन्धित छैन, संयोगले कसैसँग कुनै नाम मिले जस्तो, ठेगाना मिलेजस्तो पनि लाग्दैन मलाई, त्यसलाई अनावश्यक ढंगले जोड्नु व्यर्थ छ,’ अध्यक्ष ओलीले भने ।
अध्यक्ष ओलीले शिक्षा मन्त्री श्रेष्ठप्रति लक्षित गर्दै विदेशीसँग विवाह गरेर नेपाल घुम्न आएको बेलामा मन्त्री बनेको भन्ने अभिव्यक्ति दिएका थिए ।
ओलीको अभिव्यक्तिमा आपत्ति जनाउँदै मन्त्री श्रेष्ठले बुधबार सामाजिक सञ्जालमार्फत् प्रतिवाद समेत गरेकी थिइन् । ओलीप्रति लक्षित गर्दै श्रेष्ठले महिलालाई हेर्ने मानसिकता विकराल रहेको बताएकी थिइन् ।
त्यस्तै, रास्वपाका सांसद शिशिर खनालले संसद बैठकमा ओलीले दिएका अभिव्यक्तिप्रति आपत्ति जनाएका थिए ।
