एजेन्सी । भारतीय टोलीका कप्तान रोहित शर्माले बुधबार अफगानिस्तानविरुद्धको विश्वकप २०२३ को ९औं खेलमा इतिहास रचेका छन् ।
रोहित शर्माले ८४ बलमा १६ चौका र पाँच छक्का प्रहार गर्दै १३१ रन बनाएका थिए र यसै क्रममा उनले अन्तर्राष्ट्रिय क्रिकेटमा सबैभन्दा बढी छक्का प्रहार गर्ने विश्व कीर्तिमान बनाएका थिए ।
रोहित शर्माले वेस्ट इन्डिजका पूर्व ओपनर क्रिस गेलको कीर्तिमान तोड्दै यो उपलब्धि हासिल गरेका हुन् । क्रिस गेलले अन्तर्राष्ट्रिय क्रिकेटमा ५५१ इनिङ्समा ५५३ छक्का प्रहार गरेका थिए । भारतीय कप्तानले ४७३ इनिङ्समा ५५६ छक्का प्रहार गरेका छन् ।
युनिभर्स बोस भनेर चिनिने क्रिस गेलले रोहित शर्मालाई आफ्नो कीर्तिमान तोडेकोमा बधाई दिएका छन्, जसमा भारतीय कप्तानले उत्कृष्ट जवाफ फर्काएका छन् । रोहित शर्माको जवाफलाई फ्यानले निकै रुचाइरहेका छन् ।
क्रिस गेलले सामाजिक सञ्जालमा लेखेका छन्, ‘बधाई छ रोहित शर्मा। अन्तर्राष्ट्रिय क्रिकेटमा सबैभन्दा बढी छक्का प्रहार गरे । नम्बर ४५ विशेष छ ।’ यो पोस्टमा रोहित शर्माले जवाफ दिए, ‘धन्यवाद क्रिस गेल । हाम्रो पछाडि ४ र ५ छ, तर हाम्रो मनपर्ने नम्बर ६ हो ।’
बीसीसीआईले रोहित शर्माको एक भिडियो पोस्ट गरेको छ, जसमा भारतीय कप्तानले आफ्नो करियरको शुरुवाती अवधिमा यति धेरै छक्का प्रहार गर्छु भनेर नसोचेको उल्लेख गरिएको छ ।
भारतीय टोलीले विश्वकप २०२३ मा अहिलेसम्म आफ्ना दुवै खेल जितेको छ र अब अक्टोबर १४ मा कट्टर प्रतिद्वन्द्वी पाकिस्तानसँग खेल्नेछ । यो खेल अहमदाबादको नरेन्द्र मोदी स्टेडियममा हुनेछ ।
