एजेन्सी । भारतले विश्वकप २०२३ मा लगातार चौथो जित हात पारेको छ । बिहीबार भारतले बंगलादेशलाई ७ विकेटले पराजित गरेको हो । विराट कोहली (१०३ अविजित रन)ले आफ्नो ४८ औं ओडीआई शतक बनाए ।
उनले सबैभन्दा छिटो २६ हजार अन्तर्राष्ट्रिय रन पनि पूरा गरेका छन् । विराटले ५६७ इनिङ्समा यो उपलब्धि हासिल गरेका हुन् । कोहलीअघि सचिन तेन्दुलकरले ६०० इनिङ्समा २६ हजार रन बनाएका थिए ।
पुणेको एमसीए मैदानमा टस जितेर ब्याटिङ गरेको बंगलादेशले निर्धारित ५० ओभरमा ८ विकेट गुमाएर २५६ रन बनाएको थियो । २५७ रनको लक्ष्य भारतीय ब्याट्सम्यानले ४१.३ ओभरमा ३ विकेट गुमाएर पुरा गरेको थियो ।
कोहलीका अलावा शुभमन गिल (५३ रन)ले १०औं अर्धशतक बनाए भने कप्तान रोहित शर्माले ४८ रनको योगदान दिए ।
२५७ रनको लक्ष्य पछ्याउने क्रममा रोहित शर्मा र शुभमन गिलले ८८ रनको ओपनिङ साझेदारी गरे । रोहितले अर्धशतक गुमाए । उनले ४८ रन बनाए । हसनको बलमा पुल शट प्रहार गर्ने प्रयास गर्दा रोहितलाई बाउन्ड्रीमा हार्डोयले क्याच आउट पारे ।
शुभमन गिलले विश्वकपमा आफ्नो पहिलो अर्धशतक प्रहार गरेका थिए । उनी ५३ रन बनाएर मेहन्दी हसन मिराजको बलमा क्याच आउट भए ।
पुणेस्थित एमसीए मैदानमा बंगलादेशले टस जितेर ब्याटिङ रोजेको थियो । बंगलादेशले निर्धारित ५० ओभरमा ८ विकेट गुमाएर २५६ रन बनाएको थियो । ओपनर तान्जिद हसन तमिम र लिटन दासबीच ९३ रनको साझेदारी भयो । तान्जिदले विश्वकपमा आफ्नो पहिलो अर्धशतक बनाएका थिए । उनी ५१ रन बनाएर आउट भए ।
लिटन दासले आफ्नो १२ औं ओडीआई अर्धशतक प्रहार गरे, उनी ६६ रन बनाएर आउट भए । शान्तो (८ रन), मिराज (३ रन) र तौहीद हृदयोय (१६ रन) सुरुमै आउट भए । मुस्फिकुर रहिम (३८ रन) र महमुदुल्लाह (४६ रन)बीच ४२ रनको साझेदारी भयो । मुस्फिकुरलाई बुमराहले आउट गरेका थिए । ब्याकवर्ड पोइन्टमा डाइभ गर्दै जडेजाले क्याच लिए । त्यसपछि महमुदुल्लाहले नसुम अहमदसँग ३२ रनको साझेदारी गरे ।
खेलका क्रममा हार्दिक पाण्ड्या घाइते भएका थिए । उनको स्थानमा विराट कोहली बलिङ गर्न आएका थिए । उनले ३ बलमा २ रन दिए । कोहलीले ६ वर्षपछि ओडीआईमा बलिङ गरेका छन् । उनले अन्तिम पटक सन् २०१७ मा श्रीलंकाविरुद्धको एकदिवसीयमा बलिङ गरेका थिए ।
बंगलादेशलाई ७ विकेटले हराएपनि भारत अंक तालिकाको दोस्रो स्थानमा छ । उता बंगलादेश सातौं नम्बरमा छ । भारतीय टोलीको ४ खेलपछि ८ अंक छ भने बंगलादेशले २ अंक मात्र जोड्न सकेको छ । न्युजिल्यान्डको नेट रन रेट भारतभन्दा राम्रो भएकाले न्युजिल्यान्ड ८ अंकसहित तालिकाको शीर्ष स्थानमा छ ।
