आर्मी क्लब आहा रारा गोल्डकपको फाइनलमा, उपाधिको लागि थ्री स्टारसँग प्रतिस्पर्धा गर्ने

काठमाडौँ । विभागीय टिम त्रिभुवन आर्मी क्लब आहा रारा गोल्डकप फुटबलको फाइनलमा प्रवेश गरेको छ । बिहीबार पोखरा रंगशालामा भएको खेलमा आर्मीले चर्च बोइज युनाइटेडलाई २–१ गोलले पराजित गर्दै फाइनलमा स्थान पक्का गरेको हो ।

त्रिभुवन आर्मी क्लबको लागि खेलको ६१ औं मिनेटमा दिनेश हेम्जनले गोल गरेर अग्रता दिएका थिए । तर, ८५ औं मिनेटमा चर्च बोइजको लागि समिर तामाङले गोल गर्दै खेल बराबरीमा ल्याए ।

नियमित समयमा खेल बराबरीमा सकिएसँगै अतिरिक्त समयमा खेल धकेलिएको थियो । आर्मीको लागि ९९ औं मिनेटमा राश बहादुर मगरले गोल गरेका थिए ।

आजको खेलमा जित निकालेसँगै आर्मीले फाइनलमा थ्री स्टार क्लबसँग प्रतिस्पर्धा गर्नेछ । थ्री स्टार जावलाखेल युथ क्लबलाई १–० गोलले पराजित गर्दै फाइनलमा पुगेको थियो ।

फाइनल खेल माघ २० गते हुनेछ ।