पाँचथर । पाँचथरको फिदिममा चौथो संस्करणको पाँचथर गोल्डकपमा नेपाल र भारतका आठ टिम सहभागी हुने भएका छन् ।
आगामी फागुन १२ देखी हुने गोल्डकपमा त्रिभुवन आर्मी क्लब काठमाडौँ, हिल्स फुटबल एकेडेमी भारत, राइटलेन एजुकेशन बाग्मती युथ क्लब सर्लाही, पथरी ११ फुटबल क्लब मोरङ, झापा ११ फुटबल क्लब झापा , नमो बुद्ध युवा फुटबल क्लब सप्तरी, रेड हर्स फुटबल क्लब इलाम र आयोजक पाँचथर क्लब सहभागी हुने भएका हुन् ।
फिदिम मा।वि।को खेल मैदानमा जिल्लाकै सर्वाधिक पुरस्कार राशिको ‘ चौथो पाँचथर गोल्डकप फुटबल प्रतियोगिता’ हुने भएको हो । प्रतियोगिताको विजेताले नगद ५ लाख ५ हजार ५ सय ५५ रुपैयाँ र उप विजेताले २ लाख ५५ हजार ५ सय ५५ रुपैयाँ पाउने आयोजकले जनाएको छ । प्रतियोगिता अवधिभर खेलाडी र अफिसियल १ सय २८ जना, रेफ्री ४ जना र २ सय जना दर्शकहरूको दुर्घटना बीमा समेत गरिने आयोजक क्लबका सचिव योगराज सेढाईले जानकारी दिनुभयो ।
यस्तै खेलको म्यान अफ द म्याचलाई ५ हजार, वेस्ट कोच,हाई स्कोरर, वेस्ट डिफेन्डर, गोलकिपर, मीड फिल्डर लाई १० हजारको दरले पुरस्कार दिइने छ । राइजिङ प्लेयर १५ हजार, हरेक दिन १ जनालाई फ्यान अफ द म्याच र सुट आउट हिरोलाई २ हजार ५ सय का दरले पुरस्कार वितरण गरिने आयोजकले जनाएको छ ।
