अन्तिम खेलमा सहज जित निकाल्दै फ्रेन्ड्स रेलिगेशनबाट बच्यो

काठमाडौँ। फ्रेन्ड्स क्लब कुपन्डोल शहिद स्मारक ‘ए’ डिभिजन लिगको रेलिगेशनबाट बचेको छ। शुक्रबार दशरथ रंगशालामा भएको खेलमा विभागीय नेपाल एपिएफ फुटबल क्लबमाथि सहज जित निकालेपछि फ्रेन्ड्स रेलिगेसनबाट बचेको हो।

लिगको अन्तिम खेलमा फ्रेन्ड्सले एपिएफलाई ४–० ले पराजित गर्यो।

खेलको १५औं मिनेटमा टोरिक जेब्रिनले गोल गर्दै फ्रेन्ड्सलाई १–० को अग्रता दिलाए। ३१औं मिनेटमा बिकास थापाले गोल गर्दै फ्रेन्ड्सको अग्रत दोब्बर पारे। ७१औं मिनेटमा रफिक अमिनुले गोल गरे भने ८२औं मिनेटमा एखरोरबेकले गोल गर्दै फ्रेन्ड्सलाई ४–० को सानदार जित दिलाए ।

जितसँगै फ्रेन्ड्सले २६ खेलबाट ३० अंक जोडेको छ। पराजित एपिएफलाई भने रेलिगेसनको खतरा कायम छ। समान ३० अंक नै रहेपनि एपिएफ ‘हेड टु हेड’मा फ्रेन्ड्सभन्दा पछि छ। शनिबार हुने खेलमा थ्री स्टारले जावलाखेललाई पराजित गरे एपिएफमा पर्नेछ। बराबरी वा हार व्यहोरे थ्री स्टार रेलिगेसनमा पर्नेछ।