काठमाडौं । नेपाल एक खेल अगावै साफ यू–१९ च्याम्पियनसिपको सेमिफाइनलमा प्रवेश गरेको छ ।
आइतबार भारतको उत्तर प्रदेशस्थित गोल्डेन जुब्ली स्टेडियममा भएको आफ्नो पहिलो खेलमा श्रीलंकालाई ५–० गोल अन्तरले पराजित गर्दै नेपाल सेमिफाइनमा पुगेको हो । नेपालको जितमा सुजन डंगोल, धर्वेन्द्र कुँवर, सुवास बम, विज्ञान खड्का र लक्षु थापाले गोल गरे ।
जितसँगै समूह ‘बी’ मा रहेको नेपालले तीन अंक बटुल्यो । समान खेलबाट समान अंक रहे पनि भारत अंक तालिकामा शीर्ष स्थानमा रहेको छ । नेपालको जितसँगै भारत पनि एक खेलअगाबै सेमिफाइनलमा प्रवेश गरेको छ ।
पहिलो खेलमा भारतले श्रीलंकालाई ८–० ले हराएको थियो । श्रीलंका भने जितविहीन हुँदै प्रतियोगिताबाट बाहिरिएको छ । अब मंगलबार हुने समूह चरणको अन्तिम खेलमा नेपाल र भारतबीच प्रतिस्पर्धा हुनेछ । समूह ए बाट बंगलादेश सेमिफाइनलमा प्रवेश गरेको छ । बंगलादेशले आइतबार नै भएको खेलमा भुटानलाई ३–० ले हराएको हो ।
