लण्डन । बेलायत सरकारले गरेको नयाँ अध्यागमन प्रतिबन्धको नियमले अध्ययनका लागि बेलायत जाने विद्यार्थीलाई ठूलो झट्का लागेको छ । जसका कारण विद्यार्थीहरुले आफ्नो परिवारका सदस्यलाई बेलायत लैजान पाउने छैनन् ।
यो घोषणा तथ्याङ्क सार्वजनिक हुनुभन्दा दुई दिनअघि गरिएको हो ।
तथ्यांकअनुसार कानुनी बसाइसराइको रेकर्ड ७ लाख पुगेको छ ।
बेलायतले गत वर्ष मात्रै विदेशी विद्यार्थीका आफन्तलाई १,३५,७८८ भिसा दिएको थियो, जुन सन् २०१९ को तुलनामा ९ गुणा हो ।
आप्रवासी विद्यार्थीका सम्बन्धमा बेलायत सरकारले गरेको नियममा परिवर्तनका कारण धेरैको बेलायत जाने सपना चकनाचुर हुन सक्छ ।
धेरै विद्यार्थीहरू अध्ययनको लागि बेलायत जान्छन्, त्यसपछि उनीहरूका आफन्तहरूले पनि सजिलै बेलायतको भिसा प्राप्त गर्छन्।
तर नयाँ नियमका कारण अब उनीहरुले त्यसो गर्न पाउने छैनन् । बेलायतका प्रधानमन्त्री ऋषि सुनकले यो निर्णयले बेलायतमा बसाइँसराइ कम हुने बताएका छन् ।
