जीत रानाभाट लण्डन रोयल ग्रीनवीच बरोको डेपुटी मेयरमा निर्वाचित

लण्डन। लण्डनको रोयल बरो अफ ग्रीनवीचमा नेपाली मूलका जीत रानाभाट उपमेयरमा निर्वाचित भएका छन्। नेपालमा कास्की घर भएका रानाभाट सन् २००८ मा बेलायत आएका थिए। उनै रानाभाटले आगामी एक वर्षलाई उपमेयरको जिम्मेवारी प्राप्त गरेका हुन्।

निर्वाचित रानाभाटले बुधबार बेलुका वुल्लीच टाउन हलमा आयोजित एक विशेष समारोहमा उपमेयरको शपथ लिँदै औपचारिक पदभार समेत ग्रहण गरेका छन्। बरोका नयाँ मेयर समेतको शपथ तथा पदभार ग्रहण समारोहमा शुभकामना दिन स्थानीय नेपाली समुदायका प्रतिनिधि तथा अभियन्ताहरु पनि सहभागी थिए।

रोयल ग्रीनवीच नेप्लिज सोसाइटी (आरजीएनएस)का अध्यक्ष समेत रहेका रानाभाटले यसअघि नेप्लिज प्रोफेसनल्स यूके, यती नेपाली एशोसिएसन यूके, क्षेत्री समाज यूके, पशुपतिनाथ मन्दिर लगायतका अन्य थुप्रै संघ संस्थामा नेतृत्व तहमा रहेर काम गरिसकेका छन्।उनले एनआरएन यूकेको २०१७–१९ कार्यसमितिमा सदस्य तथा २०१९–२१ मा सचिवको जिम्मेवारी सम्हालेका थिए।